BÍ/Bolungarvík spilaði um nýliðna helgi við Þrótt í Lengjubikarnum. Skemmst er frá því að segja að Þróttur vann leikinn 2-0, en lið BÍ/Bolungarvík var manni færri frá 34.mínútu. Margir ungir leikmenn skipuðu lið BÍ/Bolungarvík og spiluðu sína fyrstu opinberu meistaraflokksleiki, þeir Dagur Elí Ragnarsson og Suwat Chaemram.

Leikskýrsla leiksins:
http://www.ksi.is/mot/motalisti/leikskyrsla/?Leikur=361185


Nikulás Jónsson var tilnefndur af UMFB til kjörs á íþróttamanni Bolungarvíkur 2014. Nikulás átti gott tímabil með BÍ/Bolungarvík sumarið 2014 og var annar af tveimur leikmönnum liðsins sem tók þátt í öllum 22 leikjum liðsins í 1.deild. Nikulás hefur verið að glíma við meiðsli í haust, en er væntanlegur aftur á völlinn í febrúar. Kjörið fór fram föstudaginn 30.janúar sl. og var það hestamaðurinn Bragi Björgmundsson sem var kjörinn íþróttamaður Bolungarvíkur árið 2014.


Viktor Júlíusson leikmaður 2.flokks og meistaraflokks karla BÍ/Bolungarvíkur hefur verið valin efnilegasti íþróttamaður BÍ árið 2014.  Hann er jafnframt tilnefndur til vals á efnilegasta íþróttamanni Ísafjarðarbæjar árið 2014. Viktor Júlíusson hefur æft knattspyrnu í 11 ár og ávallt leikið með BÍ/Bolungarvík. Viktor spilaði 8 leiki með meistaraflokki BÍ/Bolungarvík í 1.deild og einn bikarleik. Viktor spilaði einnig 3 af 7 leikjum liðsins í Lengjubikarnum, auk þessa að spila fjölda æfingaleikja. Viktor var fastamaður í leikmanna- og æfingahópi U-17 ára landsliðs Íslands árið 2014, og spilaði samtals 5 landsleiki á árinu 2014. Viktor spilaði 3 landsleiki og skoraði eitt mark á æfingamóti UEFA á N-Írlandi í apríl. Viktor spilaði 2 landsleiki í undankeppni Evrópumóts U-17 í Moldóvu í október sl.


Besti leikmaður meistaraflokks karla hjá BÍ/Bolungarvík leiktímabilið 2014, Matthías Kroknes Jóhannsson, hefur verið valinn íþróttamaður ársins 2014 hjá félaginu. Hann er jafnframt tilnefndur til vals á íþróttamanni Ísafjarðarbæjar 2014.
Matthías Kroknes Jóhannsson hefur æft knattspyrnu á Ísafirði í 15 ár. Matthías var mikilvægur hlekkur í 1.deildarliði BÍ/Bolungarvíkur keppnistímabilið 2014. Matthías spilaði 18 leiki með liðinu í 1.deild og skoraði auk þess 1 mark. Liðið endaði í 10.sæti 1.deildar og var Matthías tvisvar valinn í lið umferðarinnar. Matthías spilaði þá þrjá bikarleiki sem BÍ/Bolungarvík lék á árinu. Matthías spilaði einnig 4 af 7 leikjum liðsins í Lengjubikarnum, auk þessa að spila fjölda æfingaleikja. Matthías var valinn besti leikmaður meistaraflokks karla BÍ/Bolungavík á lokahófi liðsins í september 2014. Matthías var einnig valinn í æfingahóp U-21 árs landsliðs Íslands í desember 2014.


BÍ/Bolungarvík hefur náð samkomulagi við Calvin Crooks um að hann leiki með liðinu nk. tímabil. Calvin er 23 ára enskur vinstri bakvörður og er einnig með bandarískt ríkisfang. Hann skrifaði undir samning við félagið um sl. helgi. Calvin kemur ma. í gegnum unglingastarf New York Redbulls og á yfir 20 leiki með yngri landsliðum Bandaríkjanna. Calvin hefur spilað á Englandi sl. ár, ma. tvö tímabil með varaliði Crystal Palace og einnig liðum í neðri deildum Englands.


Sigurgeir Sveinn Gíslason varnarmaður og leikmaður BÍ/Bolungarvík endurnýjaði samning sinn við félagið og mun því spila með liðinu nk. tímabil. Sigurgeir hefur spilað með BÍ/Bolungarvík allan sinn meistaraflokksferil og á að baki 208 deildar- og bikarleiki fyrir félagið. Þetta eru mikil gleðitíðindi fyrir félagið að halda í þennan reynslumikla varnarmann.


Matthías Kroknes Jóhannsson leikmaður BÍ/Bolungarvík hefur endurnýjað samning sinn við félagið til næstu þriggja ára. Matthías spilaði 18 leiki í 1.deildinni í sumar og skoraði eitt mark. Hann var svo valinn besti leikmaður meistaraflokks karla á lokahófi félagsins í september sl. Þá hafa þrír heimamenn endurnýjað samninga sína við félagið sl. vikur sem er mikið fagnaðarefni.


Leikir og atburđir